منتخب هندسة و غروب شمس الجامعة

"يمكن قليل جدا الحيفهم الحاجة دي ، لكن صدقناها أو لأ ، حياتنا الجامعية انتهت و كتير مننا عايشين حالة نكران حتى جزء مننا بجي الجامعة و بتظاهر انه مافي حاجة حصلت ، ما هندا نحن بنجي و بنتونس حتى بندرس بس عشان نجي الجامعة ، بنكون كتير من الوقت في البيت أو في الترينينج أو حتى في الشغل للناس الاشتغلت بفكروا في لحظات قضوها في الجامعة دي و بضحكوا مرات مع نفسهم لمن يتذكروا مواقف جميلة و لحظات ظريفة عاشوها و مرات لحظات حزينة و لكن في الحالتين بنتهوا بالأسى لمن يدركوا انهم في مكان مختلف في اللحظة و التو و يتحسسوا أبعاد المكان الحالي ليهم سواء السرير أو الكرسي بتاع المكتب أو حتى مفتاح العجل في الترينينج ، و بشعروا من جديد بي حقيقة انهم انتهوا فبحاولوا يشغلوا نفسهم منها ، ما علينا من الكلام دا كلوا ، انتهت السنة دي ، لكن ظهرت لينا حاجة أخيرة ، حاجة كانت بتشكل حدث مهم من كل سمستر تاني في الجامعة و للمرة الأولى حتحصل في السمستر الاول و هي منتخب هندسة و دوري الجامعة ، كلنا حسينا بالأسف لأنه النهائي الأخير لينا في الجامعة ما اتلعب تحت الظروف الكانت في البلد عموما و في الجامعة خصوصا ، كلنا عايزين نغادر بي حاجة نفتخر بيها ، انه في فترتنا حضرنا 3 نهائيات مع لقب وحيد ، و دايرين نضيف عليهم نهائي رابع مع لقب تاني ان شاء الله ، كذكرى طيبة لي فترتنا الجامعية في كلية الهندسة ، دفعة 07 قدمت كتير للكلية و ما زالت بتقدم كأساتذة في الفترة الحالية ، لكن من الجميل انه نختم السنة الحالية و اللي هي سنة تخرجنا على شهادات التخرج بي لقب أخير كتحية و رد جميل من الكلية و كتكريم لي فترتنا كطلبة و لي ذكرى نحتفظ بيها و نحكيها يوم من الأيام ، نهاية سنة ، نهاية حياة جامعية ، لقب جديد و أخير لينا و طبعا ما أخير ل هندسة ،و زي ما بقولوا الانجليز One more last time"

الكلام دا كان بي تاريخ 30 ديسمبر 2012 و الجدير بالذكر انه انتهت المباراة بالتعادل 2-2 و ضربات الجزاء لعبت في يوم آخر و انتهت بفوز طب 5-4