ست الشاي مساحات من الممكن

المكان عبارة عن راكوبة
ارتفاع مدخلها ما بيزيد من 170 سم

مبنية في شكل نصف كروي كدا

it encloses everyone inside
like a cave
filled with warmth and intimacy
so it brought everyone who enters it into close interaction with the community of the place.

مبنية من بروش سعف و كراتين و شوالات خيش و بلاستيك للسقف و حطب للاعمدة
الجهة الجنوبية ليها حيطة مصنع
المدخل شمالي
بتجي داخل من الباب الشمالي الغربي و ست الشاي بتكون مقابلاك مباشرة قطريا
قاعدة جنوب شرق
بديها موقعها امتياز انها مركز  القوس
بتقدر تتكلم مع اي زول
و هي بتعاين ليه في وشه بصورة مباشرة
فبتكون كأنها مصدر الضو بالنسبة للكهف دا
الحاجة التانية القوس بخلي الاشعة دي (كتعبير رمزي) تمشي و تنعكس و تفضل موجودة في الداخل و تنور المكان الاشعة هنا رمز للتفاعل بين الناس البتدخل الموقع دا
ابرز المشاكل في الصيف الحر بيكون شديد
فلو اتلقت فكرة تكييف ممكن تساعد انها ترفع من التجربة بتاعت الموقع دا
الحاجة التانية هي الفئات المختلفة من عمال و موظفين البتجي تتبادل افكارها في شكل الونسة و الملاطفات عن طريق المشاغلات و المطاعنات و المساخة الظاهرية المبطنة حنين و لطف و إلفة.

a form of censored desires
intimate feelings disguised as provocative and harsh comments.

 

فبتلقى مختلف الاثنيات و الثقافات و الخلفيات الفكرية و الاجتماعية
بتطرح مواضيع عامة و منها بتقدر تشوف دا جا من وين و ليه بفكر كدا و مرات كتيرة بتكون في معلومات مغلوطة لكن ما مهم و ما بتأثر في سير التفاعل العام للموضوع.

a sort of public discourse and very political debates are presented within this site
ranging from child marriage to International politics.
A lot can be learn within this well bound small place

من المواضيع الاتفتحت في ست الشاي الاسبوع دا. 'العنصرية' بين القشور الليبرالية و التواصل الاجتماعى الحقيقي.

الونسة كانت عن العرق، مجموعة من العمال (عتالة) كان بتناقروا و بيسألوا واحد انه أصله من وين؟ قال ليهم هو من عطبرة و همهم بي أبيات مدح لي عطبرة فقاطعوه لا انه اصلكم من وين يعني ، فقام قال ليهم نحن جعلية درجة تالتة لكن

قال ليهم عندنا حبوبتنا لي ورا كدا خادم قريبة جماعة قاعدين معانا هنا، كلهم ضحكوا ، قالوا ليه كيف يعني ، قال ليهم زبيرية. قالوا ليه يعني شنو زبيرية ؟ قال ليهم جيب زبير يعني الناس الكان بجيبهم الزبير زمان، قالوا ليه رقيق يعني قال ليهم اي. لمن تقرا الحوار دا او تسمعه بتتوتر عديل.

لكن لمن تشوف الحواجز الاتكسرت و ترجع تحلل و تقرا الحاجة دي من منظور تاني بتقدر تستوعب الحاجة الحصلت بالجد في القعدة دي. الناس ديل عندهم علاقة قوية مع بعض (أصحاب و زملاء عمل) قدروا عن طريق التواصل القوي بيناتهم دا يحيدوا اللغة المحملة بجراحات الماضي لي مساحة مشتركة تسعهم كلهم.
دي نفس الحاجة الكان بتكلم عنها Slavoj Zizek لمن كان بنتقد في الPolitical correctness اللي هي قيود لغوية على الكلمات الممكن تستخدمها و الكلمات البيعتبرها "المجتمع" جارحة و ما مفروض يتم استخدامها و بيخترع ليها كلمات او اشارات بديلة ، الحاجة السماها آلان باديو الارهاب اللغوي.

“We have to put an end to the linguistic terrorism that delivers us into the hands of our enemies. Giving up on the language issue, and accepting the terror that subjectivity forbids us to pronounce words that offend dominant sensibilities, is an intolerable form of oppression” -Alain Badiou

المسألة الواصل جيجيك في توضيح مشاكلها ، انه لمن تعمل رقابة على كلمات معينة بتنقل و بتعمل اختزال مخل للمعبر عنه في المعبر به، بدل ما تواجه الحمولة التاريخية للكلمات دي عن طريق التواصل المباشر معاها و تقبلها كتاريخ مشترك لأسلاف المسترِق و المسترَق على السواء، و بيعيق تجاوزها. و بتزيد من اشباع الكلمات دي بالحمولة "السيئة" ليها لأنه بتحولها لي بعبع شي بيتخاف يتقال و يتنطق في العلن و بيتحبس في الضلام بس، و بيزيد من استمراريته، سانت جورج عنده مقولة انه ما يجلب للضوء يتحول لضوء، بمعنى انه اخراج الكلمات و التعابير دي للعلن بينهي ظلاميتها دي بمواجهتها.
جيجيك بيضرب مثل كان بي انه أصدقاؤه السود جو كلموه انه ممكن يقول ليهم Nigger بدل الاستخدام الشايع لي " The N word " فقال دا جايي من انه هو وصل معاهم لي مستوى من التواصل نقلهم من مربع الماضي لي مربع جديد مكون من الماضي بي شقينه و من الحاضر و سمح ليهم يمضوا قدما لي مساحة أبرح.
نفس الأفكار دي استخدمها إدوارد سعيد في كتابه Culture and Imperialism و اتكلم عن ضرورة مراجعة التاريخ الاستعماري احادي الراوية بمعنى يا من جانب المستعمِر أو المستعمَر العادة بيكون محمل برواية اعتذارية أو لغة لوم، لي تاريخ مشترك يتم تقبله كتجربة شكلت الواقع الحالي و يسمح للتجاوز. نفس الحاجة كان واعي ليها عبدالخالق محجوب في خطابه أمام مؤتمر المائدة المستديرة لحل مشكلة جنوب السودان.
"وكنا نأمل لو شملت تلك التغييرات مفاهيم بعض إخواننا هنا الذين يسموننا بأحفاد الزبير باشا ، ونحن نقول لهم بصراحة ووضوح ، نعم نحن أحفاد الزبير باشا ، فنحن لا نتهرب من تاريخنا ولكنا ننظر إليه نظرة موضوعية ناقدة وفي غير مرارة نستمد منه الدروس ونستقي منه العبر"
"ولو كنا ننظر للتاريخ بمرارة ومن جانب واحد لما كان بيننا اليوم بعض الضيوف الكرام فنحن ايضا لا ننسي شهدائنا في كرري وعام 1821 وسنة 1924 ، ولكن هذا تاريخ "
"ثم ليذكروا أن أحفاد الزبير يتغيرون ويتطورون مع الزمن وهم الآن يبنون السودان الحديث وقد لفظوا إتجاهات المحافظة ونشأت بينهم منظمات حديثة ديموقراطية متقدمة ، ووصلوا إلي درجة أن يكون بينهم حزب شيوعي"
"إن دراسة أخطاء الماضي وإنتقادها بصراحة وبوضوح قد أصبح أمراً هاماً وملحاً ، إذا كنا حقا نريد بداية تاريخ جديد خالي من سياسة التبريرات وإختلاق المعاذير "
نص الخطاب كاملا:http://www.ahewar.org/debat/show.art.asp?aid=574988

التعقيب الأضافه لاحقا محمد ابراهيم نقد بعد ربع قرن بيستمر في نفس الاتجاه :

"تجاوز الزمن ربع قرن على هذه الفقرة (خطاب عبدالخالق محجوب امام مؤتمر المائدة المستديرة لحل مشكلة الجنوب ) المشبعة برياح أكتوبر . و تفاقمت أزمة المجتمع السوداني عما عرف و حصر آنذاك في مشكلة الجنوب لتصبح أزمة و مشكلة السودان بكلياته : هويته ، وحدته ، نظام حكمه ، ثروته ، ثقافته ، مكانته في العالم المعاصر ...و تراكمت على مخلفات الماضي ، بكل ثقلها ، رواسب و افرازات الأمس و اليوم في الحاضر اللئيم . و شمخ التحدي و استأسد . و بات على أبناء السودان أن يواجهوا هذا التحدي بذات الشموخ و الجسارة - أبناء السودان من حيث هم كذلك : أحفاد الزبير و أحفاد من استرقهم الزبير ، مواطنون سودانيون أباة تجمعهم و توحدهم مواطنة لا يحد منها و لا ينتقص فيها فارق عرق ، أو جنس أو دين ، لا يستشعرون مذلة من انكسار الرقيق ولا مكرمة من زهو المالك ، يعقدون خناصرهم لتحرير الإنسان السوداني من عقده و رواسبه ، يردون اغترابه الجسدي و استلابه الروحي ، يصارعون حتى يصرعوا مخلفات الماضي في العنجهية و مركب النقص ، في المباهاة بالحسب و في الحقد و الانتقام المؤجل ، في النسيان المخدر المريح و في الذاكرة القلقة الواخزة ، في الاستعلاء و في الاحتقار المكتوم ، في الوقار المنافق و في الاستهتار الصلف ، في الثقة الزائفة و في الشك المرتاب .
تلك مهمة جيل ، و جيل معطاء ، يحمل الرسالة عن وعي بثقلها ، لا ظلوما ولا جهولا."

ــ أكتوبر1993 محمد ابراهيم نقد (كتاب علاقات الرق في المجتمع السوداني).

و شخصيا بعتبره من أجمل ما كتب عن الفكرة دي و الفهم العميق للمشكلة. في الختام بفتكر انه الزول دا في ست الشاي نفذ الحاجة دي تماما و كان كل الناس متقبلة الكلمات و المشاغلات دي عادي،انا في البداية اشمئزيت لكن لمن شفت الحوار و شكله و طبيعة العلاقة بينهم فهمت و انتبهت انه في مساحة أوسع. كان بعد خلص المشاغلة قال ليهم دا كله كلام فارغ النسب و الحسب الناس كلهم واحد، قام واحد قال ليه يعني انا و انت واحد؟ قال ليه لا طبعا انا و انت ما ممكن نكون واحد في استثناءات و تاني كلهم ضحكوا، و كان في جو ارتياح حقيقي جو بتاع المساحة الممكنة.